For ganske nøyaktig eit par månader sidan spurde Innsida-Guri (pent) om ikkje idrettsutøvarar kan slutte å seie at det er «heilt sjukt» og «sinnssjukt» at dei vann. Dei kan heller seie at det er «friskt».

Godt spurt, seier eg, og sender mikrofonen vidare til årets The Voice-deltakarar: Når programleiaren – Øyvind, heiter han, og han gret sikkert då han blei fødd, fordi han ante at han og dommar Morten (Harket) kom til å få dårleg kjemi – seier at «i dag står du her, på scena; kor sjukt er ikkje det», skal du ikkje svare at «det er berre heilt ... kjempesjukt».

Nei, sei heller at det å vinne er «moro», «ei ære» eller «fabelaktig». Vi har mange ord å ta av. «Gjævt». «Gildt». «Drusteleg». Eventuelt kan du berre himle med auga, fnise eller gjespe.

Toillot

Årets antisjuktpris går til The Voice-vinnar Thomas Løseth, som i staden for å ty til «sjukt» då han fekk vite at han hadde vunne, sa: «Æ veit itj. No må æ berre ... Æ skjønn’ itj det her. Det her er så toillot.»