Det er november, og hausten har festa eit fast godt grep om alt som no skal skifte farge og forgå. Frå vindauget i bokstova ser me stivnakka lauvblad som prøver å protestere. Dei vil ikkje sleppe taket. Men hausten er barsk og utan sympati for at bjørka er blyg og ikkje vil stå naken blant folk midt på lyse dagen. Me oppmodar lesarane til å vise medkjensle og ikkje peike nase neste gong de går forbi ei bladlaus bjørk.

Her i Klok-redaksjonen er det boklækjaren som bestemmer, men eg tek sjølvsagt omsyn til kva lesarane uttrykkjer ynske om. I staden for meir prat om poesifestivalen i Ulvik er det mange som no kunne tenkje seg eit sitat frå Under høststjærnen av Knut Hamsun. Eg ville vel ha vore eit skarn om eg ikkje lytta, sjølv om etterspurnaden er noko eg har funne på. Store-Knut skriv: «Jeg gik ind gjennem skogen, jeg begyndte å røres til tårer og var henrykt, jeg sa hele tiden: Gud i himlen at jeg skulde komme hit igjen!

Som om jeg hadde været der før.»

Så til løysingsboka i dag. Gunder Runde skriv: «Dersom omgrepet kortreist kan takast i bruk når det gjeld Klok på bok, må det (for min del) vere i samband med dagens bok. Det tar om lag 10 minutt å køyre frå Ulsteinvik til Samvirkelaget på Hareid, som truleg er hovudarenaen for debutboka Butikksongar av Helene Hovden Hareide. Eg ser ikkje bort frå at ho kan ha hatt sommarjobb på denne butikken, i alle fall viser ho høg grad av kunnskap om gjenstandar i frysedisken og fruktavdelinga. Helene (me er på førenamn med nesten alle her på våre kantar) er litteraturvitar og journalist, mellom anna med bakgrunn frå kulturorgan som Morgenbladet og Vagant. Eg og mange med meg har hatt stor glede av epistlane ho har skrive i lokalavisa Vikebladet/Vestposten. Ho har tidlegare gjendikta samlinga Migrasjoner av Gloria Gerwitz. Kjekt å lese dikta hennar, ikkje minst der ho siterer farfaren på sunnmørsk. Eit heldig val når det gjeld å velje kandidatar til den gilde bokspalta i D&T!»

Laurits Killingbergtrø skriv: «Det var hintet til boktittelen som hjelpte meg denne gongen, nemleg ’noko som skal få deg til å handle’. Det hadde eg i tankane da eg sveipa gjennom oversynet over ny lyrikk frå 2020, og dei stansa ved boktittelen Butikksongar. Vakker song kan skape trivnad i ein butikk (annleis enn når varehusa somtid slepper laus musikkanlegget sitt i julehandelen). Og så har boklækjaren enda ein gong henta fram ein yngre, nynorskskrivande forfattar, Helene Hovden Hareide. Jamvel namnet hennar fengjer, med bokstavrim og sprakande sunnmørskonsonantar og innbaka i namnet eit par andre kjende sunnmørspersonlegdomar. Helene Hovden Hareide er nemleg frå Hareid og er fødd i 1989, det året spanjolen Camilo José Cela vann Nobelprisen i litteratur. Eg tykte det var lett å lese boka og følgje med på assosiasjonane som forfattaren har. Men det var nok inga songgruppe som underheldt i butikkane eller i heimane, det var andre lydar som ein sjølv må gjere om til musikkopplevingar.»

Leiting etter løysing på oppgåve 1503 vart god butikk for: Signar Myrvang, Eli Winjum, Gunn Bull-Berg, John Olav Johnsen, Skeisebibliotekaren i LASK, Ragnhild Eggen, Ingebjørg Sogge, Fritjof Lampe, Ingeborg Helvik, Inger Anne Hammervoll, Laurits Killingbergtrø, Olav Holten, Gunnar Bæra, Gunder Runde, Kjell Håve, Odin G. Lavik, Ole Husby, Erik Aamlid, Per Trygve Karstensen, Petter Kristensen, Nils Farstad, Torbjørn Ohnstad Skaim, Eli Hegna, Eirik Holten, Sissel Gunnarshaug, Audun Gjengedal, Pål Amdal, Jan Alfred Sørensen, Folke Kjelleberg, Gunnar Eide, Jorunn Røyset, Kirsten Bakke, Lise Haaland, Gunnlaug Ribe, Bjørn Gjermundsen, Torbjørg Langdal, Dei kvasse på Fana, Robert Øfsti, Jorunn Brekke Fjeldheim, Turid Tirevold, Inger Margrethe Berge, Sjur Joakim Fretheim, Torleik Stegane og Ole G. Evensen. Denne veka heiter bokvinnaren Turid Tirevold. Gratulerer!

Klok på bok 1505

For meg er det derfor skjult hvorvidt bestefaren min tok alt som stod der på alvor, eller ingenting. Hadde han trodd på alt sammen, ville han vært som de teologer som gjemmer teologien i et lukket hylster et eller annet sted i hjernen, eller kanskje heller som reisende som har jod på en flaske i bagasjen, men passer på å sette korken skikkelig på plass slik at ingenting renner ut og ødelegger bagasjens innhold.

Sitatet er frå s. 21 i boklækjarutgåva (2000). På originalspråket kom romanen ut i 1957. Me skal fram til ein nobel forfattar som var fødd i eit år då Nobelprisen i litteratur gjekk til ein tysk forfattar. Me får høyre mykje om ein operasongar i løysingsboka, og før eg godkjenner svaret, vil eg vete namnet på denne figuren. Send namn på songar, forfattar og verk til klok@dagogtid.no. Svarfristen er til og med 13. november.

Medikus Libri