Lite portrett

Han var ein meister i å spå i fortida.

Liten kommentar i Finland

«Nei, ein kan ikkje sitje her og drikke seg vekk.»

Finsk oppskrift

Vertinna vår, Rauni, var i si tid ei sentral kraft i det såkalla expatmiljøet i Kiev. Dette miljøet inneheldt konene til ambassadørar og andre ambassadetilsette menn, og konene til visse andre utanlandske menn med meiningsfylte oppgåver. Desse kvinnene hadde i det store og heile ingenting å drive med, og så var det nokre av dei som tenkte at dei fekk finne på noko. «Noko» blei til ei kokebok, der alle skulle bidra med ei eller fleire oppskrifter. Her er Rauni si:

«Northern Finnish-
Kievite Bird Soup

(Seks porsjonar)

Skyt ein lokal fugl (du kan også kjøpe han)

Reins og salt han

Kok han i vatn saman med urter

Hell ut vatnet

Kok han så i to liter mjølk og hell ut mjølka

Legg han til slutt i to liter vodka og varm opp til kokepunktet

Hell ut fuglen

Nyt suppa kald!

Liten observasjon

Duene sit på taket og googlar.

Så var det våren, då

Ja, våren er midt iblant oss, og det er vanskeleg å beskrive den gleda eg kjende då eg kunne hente småskorne ut frå mørkekottet, børste støvet av dei og deretter springe med småsko på bort til Kiwien og handle inn nokre øl.