Det er mange vanskelege val i livet. I løpet av ein heilt vanleg dag må vi menneske ta tusenvis av val. Skal eg stå opp nå eller slumre litt? Må eg vaske håret eller greier det seg ein dag til? Brød eller knekkebrød til frukost? Sykle eller gå til jobb? Skal eg kjøpe meg eit hus på Overvik? Og så vidare. Vi i Innsida har på ingen måte tenkt å hjelpe deg med desse vala. I staden for skal vi introdusere deg for nokre intrikate dilemma, slik at du får litt pause frå dine eigne, trivielle kvalar.

Samtale

Guri: Kva har høgast status for tida, å ha dårleg tid eller god tid?

Sigrid: Det har jo vore status å ha det travelt ei stund nå, så eg tippar at det snart blir moderne å ha god tid.

Guri: Ja, det trur eg òg. Det blir status å seia at ein har drukke kaffi og lese avisa i tre timar.

Sigrid: Tomme luker i kalenderen og ingen ferieplanar.

Guri: Å ha litt for lite å gjera på jobb.

Sigrid: Å potte om plantene sine.

Guri: Å lesa Teknisk Ukeblad frå perm til perm.

Sigrid: Å kose seg med frimerkesamlinga.

Guri: Å stryke sengekleda og kopphanddukane før ein bruker dei.

Sigrid: Å kverne sitt eige mjøl med ein stein.

Er 60 prosent av kvinnene til for pynt? (Guri)

Av og til dumpar det ned eit Teknisk Ukeblad i postkassa vår. (Det kan ha samanheng med at ektemannen (!) min er medlem i Tekna, utan at medlemskapen har noko særleg større konsekvens enn at akkurat dette litt artige vekebladet dukkar opp.) Eg synest det er interessant å bla gjennom det, for det gjev nokre litt andre perspektiv på livet, ein kan lære noko om korleis folk frå den andre livsskulen tenkjer og kva som er viktig for dei. Det slår meg at forståing på tvers av dei to ulike livsskulane er utfordrande. (Med «dei to ulike livsskulane» meiner eg for eksempel ingeniørutdanninga ved Gløshaugen, gamle NTH, kontra dei humanistiske faga ved NTNU avdeling Dragvoll.)

Det blir prata om at det er viktig å rekruttere kvinner til teknologiske yrke. Men det er kanskje berre tomt prat? Det eg bit meg merke i i Teknisk Ukeblad denne gongen, er noko så banalt (og kanskje uinteressant) som kjønnsbalansen. I utgåva datert 28. august 2018 er det bilde av grovt rekna 183 menn og 45 kvinner, noko som gjev ein kvinnedel på 20 prosent. Det kan nemnast at 27 av dei 45 avbilda kvinnene inngår i reklamefoto (altså heile 60 prosent), og at 18 av desse kvinnene ikkje er ekte, men digitale montasjar. Åtte av dei digitale kvinnene gjer husarbeid (støvsuger). Ingen mann avbilda i bladet, korkje ekte eller digitale, gjer husarbeid.

Kva er det eigentleg Teknisk Ukeblad prøver å fortelja oss?