Note 1: Før i tida såg vi på vårblomster; no ser vi på vårtatoveringar – gjerne blomster, forvirrande nok. Det siste er tatoveringar med 3D-effekt, slik at det ser ut som om blomane veks ut av armane på folk. Ta ein tur til Grünerløkka; der luktar det gartneri.

Note 2: For å illustrere kor lettlurt eg er, kan eg fortelje om då eg kjøpte ein «perfekt familiebil» – sjusetar – via Finn. Seljaren garanterte at bilen var «i tipp-topp stand», og etter litt prøvekøyring (på ein parkeringsplass), betalte eg 29.000 kroner i kontantar (som eg hadde tatt ut i åtte–ti minibankar), og så feis eg av garde, glad for at eg og gjengen min endeleg hadde bil og kunne køyre til Sunnfjord, kanskje Spania.

Sidan tanken var tom, køyrde eg til nærmaste bensinstasjon, der eg oppdaga at når eg fylte, rann bensinen ikkje berre ned i tanken, men ut i lufta via eit hol i røyret. Eg ringe seljaren, som straks kom og forsikra at det kosta maks 600 kroner å reparere «bagatellen». «Ikkje noko problem.» Han gav meg ein tusenlapp og var kanskje trollmann, sidan eg var underleg nøgd heile vegen til verkstaden.

Etter ei tid, då eg hadde brukt 29.000 nye kroner på reparasjonar og mekanikaren sa at «no må du bli kvitt dette vraket» og «du er galen som fraktar ungane dine rundt i noko slikt», selde eg bilen for 2.500 kroner, med nye dekk.

Bilen var forresten blågrøn.