Ja, Innsida går ikkje av vegen for å starta nye spalter. Vi har spalter for både matskattar og skilt, så kvifor ikkje ei som lyftar fram dei noko særmerkte plateomslaga frå tidlegare tider. Før i verda vart nemleg musikk omsett fysisk i eigne butikkar, og musikken var svært omstendeleg pakka inn med både artige namn og artige bilete på omslaga.

Slik er det ikkje lenger, men ved å lyfta dette fram, vonar Innsida å skapa ein kultur for at me skal sjå dette igjen.

Det fyrste dømet er den opprørske rockegruppa Them, som verkeleg tok opp kontroversielle saker, men som likevel valde å kle seg veldig skikkeleg for å nå fram. Dei er sinte. Dei vil noko – og dei har tatt på seg slipset.

Det andre dømet er den ukjende songaren Matt Berry, som ikkje berre har teke turen utandørs, men som har pynta opp med ein fin skogsfugl for å gjera bodskapen endå meir interessant for ungdommen. Dersom nokon av lesarane våre har andre døme, tek me som vanleg imot.