Dag og Tid har fått nytt avisproduksjonsdatabehandlingssystemopplegg. Dagen då det nye avisproduksjonssystemopplegget, som er finsk, blei implementert, var kosteleg. Deskarbeidarar og journalistar, to svenske avissystemekspertar* og ein gammal golden retriever kakla, kjekla og veiva med armar og bein over dei nye avissidene, mens herr Gjerdåker - sjefen – kommenterte sindig frå sidelinja: «Det blir som når ein skal ha nye kyr inn i floren. Det blir fort eit kaos. Dei første vekene er dei knapt råd å mjølke. Men slapp av, det går seg til.»

*Den eine ekspertsvensken, som òg var til stades då avisa du har framfor deg, gjekk i trykken, er faretruande lik Eirik Jensen, berre at han er tynnare og har lengre hår. Han køyrer i tillegg Harley Davidson. Sidan Dag og Tid held til omtrent vegg i vegg med Oslo tinghus, der Eirik Jensen for tida sit på tiltalebenken dag ut og dag inn, må svensken stadig svare på om ikkje han har gått feil. Jammen har han ikkje blitt nøydd til å dele ut ein autograf òg. Her ser du bilete av dei to. Gjett kven som er kven.