Om handtrykk

Eg har notert meg at NRK har laga ein serie der konseptet er å vise at det berre er seks handtrykk mellom deg og ein eller annan internasjonal superkjendis. Akk ja, eg har innsett at det ikkje er meir enn tre handtrykk mellom meg og Donald Trump. Eg skal ikkje gå grundigare inn i materien, då det ikkje er noko eg er spesielt kry av og fordi det alltid er folk der ute som trur eg berre er ute etter å tøffe meg.

Om tolking

NRK hadde for nokre dagar sidan denne overskrifta: «Store problemer med å tolke fjellet». Og det er visstnok det relativt kjende og rasfarlege fjellet Mannen det er snakk om.

Dette kan nok høyrast ut som eit typisk i-landsproblem, men no er iallfall ein gjeng med hardbarka fjelltolkar på veg med fly frå Nepal, så då er det vel håp om at dette kan ordna seg.

Amerikanske fly skal sleppe bomber mot bakkemål i Nord-Norge (NRK igjen)

Så vidt ein veit er det først Kirkenes og Vardø som skal bombast, og deretter kjem turen til resten. Forsvaret opplyser elles at «det er ikke nødvendig å informere Russland». Nei, det kan fort bli for mykje informasjon, og noko av han kan til og med komme på avvegar.

Boktitlar – ein uting?

Dette med å finne på titlar på bøker er ikkje enkelt, og det skal det kanskje ikkje vere heller, kva veit eg? Mange titlar seier altfor mykje, og andre seier nesten ingenting, og ikkje minst – ei uhorveleg mengde med titlar er umulege å hugse. Slik at når du står der i bokhandelen og skal spørje etter boka, så er det heilt tomt i hjernen din der boktittelen skulle ha vore. Og så står du no berre der. Men nokre titlar er nærmast perfekte, og her er eit godt eksempel på ein boktittel som ikkje tar munnen for full.