12. mai 1908 opna Aarø Automobilselskap det fyrste norske rutebilsambandet. Det gjekk frå Molde til Batnfjordsøra.

At det var her, og ikkje i meir sentrale strok sør og aust i landet, at rutebussen kom fyrst, er elles rimeleg. Dette var hovudvegen mellom Sunnmøre og Kristiania, og bussen korresponderte med dampbåt til Kristiansund og Trondheim og Rørosbanen gjennom Østerdalen til hovudstaden. Med bussen kunne dessutan båtpassasjerar langs kysten lura seg tørrskodde utanom den lumske Hustadvika.

Den fyrste norske «bussen» – ein 1907-modell av merket Unic – hadde rom for førar og fem passasjerar. Med 18 hestekrefter til disposisjon gjekk den 36 kilometer lange turen med avgang frå Molde kl 19.00 som ein røyk på 1 time og 15 minutt, med retur frå Batnfjordsøra klokka 22.00.

Men alt vinteren etter kom hesten og sleden til heider og verde att, for brøytebilen hadde framleis ikkje funne vegen til Noreg. I 1913–14 prøvde dei å setja meiar på framhjula til bussen og ein trommel bak med firtoms piggar til framdrift, men slik skodd sleit doningen for hardt på vegen over Fursetfjellet.

Til sist utvikla Aarø Automobilselskap sin eigen brøytereidskap, men det er ei anna soge.

Unicen var kabriolet, open med kalesje, og han hadde fransk motor og understell. Men karroseriet var laga her i landet, av Kolberg, Caspary & Co, i lokala til Kløvstad & Søns Vognfabrik i hovudstaden. Etter fire års teneste tok andre og større køyrety over rutetrafikken, men pioneren, T-1, har Romsdalsmuseet teke vare på til denne dag.

Jox