Oppsummering av OL:

Stort sett har det vore trippel norsk i dei fleste øvingane. Kanskje vi skal arrangere noregsmeisterskapen i Noreg neste gong, og ikkje i Sør-Korea? Utruleg tungvint å måtte flytte heile den norske truppen så langt av garde.

Vi synest at nivået på OL-utøvarane har gått kraftig ned. Før i tida gjekk folk på ski frå heimen sin og dit OL vart arrangert. Slik er det ikkje lenger. Det seier jo litt at ein ung debutant, som trynar fem meter etter start, greier å vinne tremila. Her kan vi nok prate om barneskirenn. Det er heller ikkje særleg tillitsvekkande at ein 21-åring som blir trena av bestefar sin, tok dei fleste medaljane i langrenn.

Russland fekk ikkje stille i OL på grunn av systematisk doping. Men nokre reine utøvarar fekk likevel konkurrere under det nøytrale OL-flagget. Nå viser det seg at nokre av russarane var dopa likevel. Betyr det at OL blir utestengt neste gong?

Sidan det russiske mixedlaget i curling vart teke i doping, fekk det norske laget bronse. Dei reiste attende til Pyongyang for å hente medaljane. Det verkar lite kostnadseffektiv og miljøvennleg å reise tur-retur Sør-Korea to gonger på eit par veker. Kunne dei ikkje berre sendt medaljane i posten?

Det var eit bra OL sett med norske augo. Men nokre nedturar har det også vore. Korkje Bjørndalen, Johaug eller Northug greidde å ta medaljar denne gongen. Skuffande!

Hurra!

Det er noko som er svært forståeleg for eittåringen i huset når personane som står på pallen græt av glede og strekkjer hendene i vêret fordi dei får ein bamse.