Hovudsaka i nyheitene den siste veka har vore at unge jenter skrur på vatnet i springen når dei skal pisse på offentlege toalett for at ingen skal høyre at dei – ja, nettopp – pissar. (Her kan ein jo spørje kva folk flest trur ein driv med når ein er på ein offentleg dass.) Og ein del av dei lar vere å skru att krana etterpå, slik at vatnet fløymer over og lagar skadar for millionar. Men dette har balla på seg, og no har til og med enkelte vaksne menn (om ein då skal kalle dei det) stått fram og sagt at dei gjer det same. Pissing er rett og slett flaut. Så, for å komme litt vidare i denne saka, sende eg ein SMS til Konrad (ja, den same Konrad som skal drive «Engleskolen II») og spurde korleis han stilte seg i denne saka. Og svaret kom prompte: «Når det gjeld pissing på offentlege dritarar, lagar eg alltid mest mogleg støy, for å understreke at no er det pissing på gang. Det fossar og plaskar og eg set rett som det er i små brøl og stønn. Når eg så endeleg ein gong er ferdig, opnar eg døra med eit brak og roper med stødig røyst: «Eg har pissa! Det gjorde jaggu meg godt! Var det elles meir du ville vite før vi kastar oss over dette engleskuleprosjektet?» Nei, det var vel ikkje eigentleg det.