Det blir mykje om den gamle skulekameraten min, han Konrad, denne gongen. Men eg kan love at det skal bli svært mykje mindre neste gong. Her om dagen var han på tråden igjen og kunne fortelje, litt snøvlande, at han hadde vunne ein av kategoriane i årets VIXEN Influencer Awards. Og for dei som ikkje forbind noko som helst med dette omgrepet, kan ein lese på ein bortgøymd stad på nettet:

«Årets VIXEN Influencer Awards 2017 gikk av stabelen søndag kveld på Grand Hotel i Oslo. Forfatter og tv-personlighet Mona B. Riise var vertinne for kvelden, hvor finalistene kunne ta med seg priser hjem innen kategorier som blant annet mote, livsstil, interiør, mat, årets gullpenn og årets stjerneskudd. Totalt ble det delt ut 14 priser i løpet av kvelden.»

Og prisane går til bloggarar, som blir sett på som spesielt viktige og med stor påverknadskraft. Ikkje visste eg at Konrad hadde nokon blogg, men det viser berre at eg framleis ikkje veit alt om fyren. Då eg så spurde kva for kategori han hadde stukke av med sigeren i, var svaret at det var i kategorien «Krenking», ein kategori eg ikkje visste fanst. Konrad sa elles at noko av det beste med det heile, var at det var ein «tv-personlighet» som delte ut prisane, då han inntil då hadde trudd at noko slikt ikkje fanst.