I matspalta vår denne gongen dukkar det opp ei svele kjøpt inn på Sylteormen Bakeri. Mange lesarar, særleg kanskje dei yngre, vil vel stussa over eit slikt namn på eit bakeri. Kvifor kan det ikkje heita Hansen og slikt? No er bakeriet i Valldal, og i slike bygder heiter ikkje bakeri Hansen.

Bakeriet er rett og slett kalla opp etter ei segn. Det skal ha seg slikt, ifylgje valldalingane, at Olav den Heilage kjempa mot ein sjøorm ute i fjorden. Sjølvsagt sigra Olav, elles hadde han vel neppe vorte kalla den heilage. Han tok livet av ormen ved å slengja han i fjellveggen.

I dag ser ein avtrykket av ormen på sørsida av det bratte Syltefjellet. Etter dette skal Olav ha reist vidare med gode minne frå turen sin til Valldal, slik Innsida òg gjorde.