Det var ein sorgens dag for alle oss Pluto-venner – korleis kan ein unngå å bli venn med den einaste planeten som er oppkalla etter ein hund i Donald? – då planeten for eit par år sidan mista planetstatusen sin, nærmast ved eit pennestrøk. Men Støttegruppa for Pluto har jobba iherdig med saka, og i det siste har det komme signal frå vitskapleg hald om at stakkars vesle Pluto, heilt åleine der ute, og så langt borte, skal få att planetstatusen. Den dagen dette er offisielt, vil det bli markert med ein større fest i hagen min. Eg har tenkt å samle ei handfull ordførarar og nokre sentrale kjendisar, og det vil bli servert brennevin og ostepop. Eit lokalt musikkorps vil spele ein nykomponert marsj til Plutos pris, og eg vil sjølv framføre ei nyskriven hymne. Ja, dette er det ingen grunn til ikkje å sjå fram til.