Det heiter seg at det er kjekt å vera nordmann i Danmark, men det er jammen triveleg å vera nordmann i Skottland òg. Skottane er kjekke, sjølv om dei kulinarisk kanskje ikkje har nådd ut over heile verda. Men sjølv om det kan finnast meir spanande stader å reisa for maten si skuld, er dei frampå og fortel om det dei kan by på. Cullen Skink er ei fiskesuppe basert på røkt hyse, potet og løk. Verdsmeister i denne suppa er Cullen Bay Hotel, berre så du veit det, viss turen går til dei kantar. Innsida har ikkje deltakarlista frå VM i Cullen Skink, men reknar naturlegvis med at konkurransen var hard i år òg.