Storfin vitjing

Av tidl. kokkelærling på Mælands Hotel i Granvin, Ivar Nimme:

Eg har laga maten i bryllaup,

til dåp og til fest,

Eg har koka for direktørar

Fylkesmenn og prest.

Servert engelske lordar,

ein sjeik frå Dubai,

og fem storkommunistar

som kom frå Shanghai.

Servert flatbrød og sild

eller steik med bearnaise,

til storfolk som vitja

med sjakett eller Fez.

Ynske var mange,

nokre var vrange,

men dei åt det dei fekk

og betalte og gjekk

Men dei kjekkaste

eg trefte

blant dei storfine gjester,

var utan tvil

Kjell Karlsens Orkester.

Riesling på Utne

Eit kjærleiksdikt av tidl. kokkelærling ved Mælands Hotel i Granvin, Ivar Nimme:

Ei solstripe smiler

inn i mitt kott,

dagen er vakker,

fjorden ligg flott

Eg hoppar or halmen

for å setta i gong

I dag har eg planar

om kjærleik og song

Ei jenta frå Utne

ei flaska, god vin,

Riesling, den turre,

Denne kvelden vert min.

Bokomslag vikarierer for plateomslag

Innsida har ikkje noko godt plateomslag til denne utgåva. Konvolutten med gode variantar av unike omslag vart attgløymd på skyssbåten mellom Hardbakke og Mjømna. Han dukkar nok opp att, som eit krav frå futen, så Innsida vil trykka dette ved eit seinare høve. I mellomtida brukar me eit bilete av lefseboka til Bodil Nordjore i staden. Eit flott motiv, der ein særleg vert imponert over at Bodil har inkludert norsk bilkultur i sitt omfattande lefseverk. Ei viktig bok, meiner mange lefseentusiastar.