Stygge genserar

Er det menneska som skapar kleda eller er det kleda som skapar menneska? Kva føler du på innsida dersom du har ein glorete genser på utsida? I januar spådde vi at stygge genserar kom til å bli moderne i år. Allereie i mars kan det sjå ut som at tipset har slått til. I Førde har det iallfall blitt observert folk med dinosaurgenser av typen Seriousaurus. Vi oppfordrar lesarane til å sende inn bilde av deira dinosaurgenserar.

Stygge genserar 2

Ein mann med to pinnar har blitt verdskjendis. Amerikanaren Sam Barsky strikkar genserar med ulike reisemål, så tek han bilde der han poserer med genserane sine framfor dei aktuelle reisemåla. Spørsmålet vi alle stiller oss nå er: Har Sam Barsky vore i Førde og blitt inspirert av dinosaurgenserane? Og dersom han har vore i Førde – kva motiv har han strikka og posert framfor? Elvetorget eller AMFI? Domus-bygget eller Rutebilstasjonen?

Innvik og Utvik

Vi har fått eit lesarbrev frå ein anonym innsendar:

«Kampen mellom Innvik og Utvik verkar jamn. Dei er ved ei vik, begge to. Den eine på utsida og den andre på innsida, tenkjer du. Men det ligg meir bak. I Utvik bur det ein polsk eksbringebærplukkar som liknar på ein sprek Frank Rossavik. Bæra han plukkar, lagar dei godt syltetøy av. Og campinghyttene bærplukkarane bur i, er veldig fine. Bæra lossar dei på ein 1972-modell Reform Muli, ein nydeleg austerriksk traktor som bringar bæra før dei vert til syltetøy. Og Humans of Utvik er den mest koselege kontoen på heile Instagram. Men kva har dei i Innvik? Eg veit ikkje, eg har ikkje undersøkt.»