Sukker- mammas

Førre veke var det ein del merksemd rundt den såkalla sugardaddyreklamen. Det var selskapet Rich Meet Beautiful som køyrde rundt i Oslo med reklameplakatar av ei halvnaken dame og denne teksten: «Hei studenter! 0 i studielån? Date en sugar daddy.» Sigurd Vedal i datingselskapet meiner at reklamen ikkje er kjønnsdiskriminerande fordi det like godt kunne vore bilde av ein mann på plakaten, men han valde tilfeldigvis å bruke eit bilde av ei ung kvinne. Dessutan er tjue prosent av dei eldre og velståande som vil treffe unge studentar, faktisk kvinner, ifølgje Vedal.

Sigrid har tatt Vedal på ordet, og har tenkt å starte ein eigen reklamekampanje der eldre kvinner kan møte unge gutar. Sidan kvinner generelt tener dårlegare enn menn, og gutar sjeldan er beautifule, så må dette nye datingselskapet heite Poor Meet Handsome. Her kan eldre kvinner i deltidsstillingar og vikariat møte unge studentar. For eksempel kan dei ete pasta og tunfisk saman, eller gå på gratisarrangement der det blir servert forfriskingar. Til gjengjeld kan dei eldre kvinnene kome med gode råd til unggutane om korleis dei får studielånet til å vare lengst mogleg.

Valgomat- valgomaten

Før kommunevala og stortingsvala dukkar det alltid opp eit mylder av ulike valgomatar som skal hjelpe veljarane med å finne ut kva parti dei bør stemme på. Men av og til kan det vere forvirrande å få gode råd, og ein kan gå seg vill i jungelen av ulike valautomatar. Kven bør ein ta? Kva automat bør ein høyre mest på dersom ein får ulike svar?

Difor har vi tenkt å lansere ein ny teneste fram mot neste val, der ein kan ta ein test for å finne ut kva valgomat ein bør ta. Eitt av spørsmåla i valgomatvalgomaten er kva parti du kjem til å stemme på. Da blir det mykje lettare å finne fram til den riktige valgomaten som er skreddarsydd akkurat for DEG!