Svele

Ein reisande vestlending

og farande fant

Eg elskar å køyra

Stoppa for kaffi

og bruka ein slant

Eg seier nei takk til pylser

og til hamburgargrill

Eg ventar til ferja

Og får det eg vil

Ei svele, ei svele

og dagen vert fin

Eg susar av stad

I Camryen min

Kom hit til Møre

til Romsdalen vår

Køyr ned på kaia

Og sjå kva du får

Ei svele med smørkrem

Ei svele med ost

Eg knip ho i handa

I svelegrep

Ho sit som eit skot

Eit velprøva knep

Faste og fine

Du treng ikkje svelte

Svela ho legg seg

rundt magebeltet

Å svele, du svele

er skikkeleg mat

god nok til kvardags

på papirtallerkfat

Gje meg ei ferje

Ja, to eller tre

Kvar einaste kai

å gleda seg te

Bru og tunnel

For noko tull

Svele og ferje

Vårt vestlandske gull

RAST

(Ein dag eg kjende meg som Lars Monsen)

Eg tok inn i skogen

og kjende skogens ro.

På ein liten stubbe

tok eg meg ein liten kvil.

Eg kledde meg naken,

spende musklane,

som ein bjødn,

heiv meg ut i det svarte tjødn.

Iskaldt vatn

Skjerpa sansane.

Eg braut vassflata

som eit prosjektil,

dukka opp,

breiskuldra, sterk.

Vassdropane som perler

på glinsande musklar.

Let sola tørka meg,

Knurra litt til hunden

så steikte eg ei pylsa

og kokte kaffi,

og sette meg inn att i bilen

for å køyra til budsjettkonferansen

i Ørsta.