Innsida har lenge vore ein stad for dei som set pris på gode sveler. Sveler er godt og ikkje minst godt stoff her i bladet. Ei god svele er med på å gjera reisa både lettare og meir innhaldsrik, synest mange av lesarane våre. Vanlegvis held svelene seg innafor svelebeltet, som litt røft kan seiast å gå frå starten av Sognefjorden og eit stykke inn i Nordmøre.

Stor var difor overraskinga då Innsida fann sveler i den vesle skotske kystbyen Banff. Før avisa skulle gå i trykken var Innsida ikkje i stand til å få undersøkt kva slags teoriar sveleforskinga har på dette funnet. Truleg er det utvandring frå Sunnmøre rett etter kommunesamanslåinga på sekstitalet som har brakt svelene over Norskehavet til Skottland. Det kan naturlegvis òg ha vore så tidleg som utvandringa mot Island, Irland og Skottland på 800-talet, men det er få haldepunkt i gamle skotske segner og slektssoger som støttar dette. Innsida vel difor å slå seg til ro med at det er gledeleg at svela har funne sin plass i det skotske kjøken. Det trengst. Me snakkar om eit land som har haggissmak på potegullet sitt.