Test deg sjølv

Du som masar om at du kan gjere ein betre jobb enn omsetjaren som tekstar den britiske krimserien du ser på, skal få ta denne setninga sjølv: «We were having our tea when she barged in, wearing only a fairly higgledy-piggledy frock and wellingtons, shouting that something was completely off.»

Kontekst: Ein mann sit i avhøyr hos politiet; han snakkar om ein nabo som er funnen død. Hugs: Skjermformat og rask tale gjer at du må komprimere; du har maks 75 teikn (med mellomrom) til rådvelde. Løysingsforslag nedst på sida.

Klimaforvirring

Då eg gjekk på ski over Grønland, snubla eg i ei kasse der nokon har planta grønsaker alle kan forsyne seg av. Grønt og grønt, fru Blom. Issalat?

Ta ein tomat

Eit par kilometer etter første grønsakskasse, snubla eg over ei kasse til, med tomat, liksom. Jammen er dei optimistiske, grønlendararane.

Valentinsord

Valentinsdagen kom og gjekk, og i alle fall éin mann gav éi kvinne ein kompliment: «Jø, for ei skjebbe du er.» (Må ein slå opp, finn ein at ei skjebbe er eit «karsleg og drivande kvinnfolk». Då er ho vel verd strevet.)

Løysingsforslag:

«Vi åt middag då ho brasa inn i kjole og støvlar og ropte at noko var gale.»

Skjønte du at det var snakk om middag, og ikkje te, 1 poeng. Visste du at «frock» er «kjole», 1 poeng. Greidde du å komprimere til berre «kjole», 1 poeng. Visste du at «wellingtons» er støvlar, 1 poeng. Visste du at «off» kan bety «gale», 1 poeng.

Fekk du 5 poeng, fortener du ein premie: Kjøp deg ein Kvikk Lunsj. Det skaper glede.