Ting som burde vore forbode

– Eingongsbestikk og eingongsservise

– Ris seld i «boil in bag» (det blir jo berre eit forferdeleg griseri kvar gong ein skal prøve å klippe opp den fordømte posen, og kven vil eigentleg ha plastikk i maten?)

– At personen du har overteke leigekontrakt av, ikkje har omadressert posten sin etter FIRE MÅNADAR

– Flytrafikk

– Sylta agurk

Reglar som med fordel kan brytast

– Hyttete hyttestil på hytta

– Bryllaupsvals i bryllaupet

– At babyen må sova i eiga seng

– Å bli seriøs etter at ein har passert 30

Fransk støttespelar

Mange hugsar sikkert den oppsiktsvekkande tweeten frå Marit Arnstad, da ho påska 2013 endeleg kunne reise heim til Trøndelag på ein etterlengta ferie: «Når jeg ser utover åkeren, sola skinner og det er helt stille, ja da tenker jeg; fuck Oslo». Senterpartipolitikaren fekk ein del kritikk for denne utsegna. Ho vart tolka som eit avtalebrot av den daverande samferdselsministeren – ho representerte jo heile landet, også Oslo.

Men nå får Arnstad uventa støtte frå fransk etterretning. Agenten Marina i serien Le Bureau har eit tankegods som ligg nokså tett opp mot den tidlegare statsrådens påstand. «Fatter ikke at han er så opptatt av Oslo. Alle driter vel i Oslo?», seier Marina i serien som blir send over heile verda.

Tenk kor negative ringverknader dette vil få for reiselivet. Vi trur at Marina må stå skulerett for desse utsegnene og truleg bli grilla av Ole Torp i eit program med temaet «Oslo – ein unødvendig by?».