Innsida skal ikkje starta nokon ny serie. Dei har me nok av, men vil likevel trekka fram noko som kan vera eit fenomen fleire stader. I så fall er det berre å senda oss bilete. Det handlar om å skapa trivelege domiljø.

Difor kan Innsida i dag bringa det fyrste bilete frå eit slikt miljø, der ein har lagt litt ekstra i det for den som lyt nytta seg av eit offentleg toalett.

Biletet er teke frå toalettet for rørslehemma på Amfi i Harstad. Innsida synest ideen om ein skikkeleg lenestol der inne gjer opplevinga meir heimekoseleg og praktisk dersom ein er fleire. Det kan henda at nokon lyt bytast bleie på, då kjem stolen til nytta for familiemedlemmer som ventar.

Tommelen opp for tiltaket.

Dersom somme lesarar reagerer på at ikkje-røyrslehemma brukar toalett for røyrslehemma, så er det ifylgje interesseorganisasjonane deira heilt i orden, etter det Innsida har erfart. Me kjem uansett ikkje til å gje plass til ein debatt om den saka her i spaltene. Det er stolen som er saka denne gongen.

Rotterdam i staden for Amsterdam

Mange nordmenn dreg på tur til den vakre kanalbyen Amsterdam. Det er eit typisk helgemål for ei lita reise. Innsida vil denne gongen koma med forslag om å byta ut Amsterdam med naboen Rotterdam. For den som alt har vore ein tur i Amsterdam, er veslebror i nabolaget vel så sjarmerande. Rotterdam ligg ei kort togreise på tjue minuttar frå Schiphol-flyplassen. Det er ein av dei aller største hamnebyane i verda, men likevel verd ein tur for den som ikkje ein gong skal senda gods ut i verda. Byen var totalt utbomba under krigen. Byen er difor ein spanande stad for moderne arkitektur. Maten er som elles i Nederland god og folkeleg. Matjessild er noko alle bør eta meir av. Ein nederlandsk restaurant med respekt for seg sjølv har naturlegvis bitterballen – enkle friterte bollar av kjøt, mjøl, løk og smør. Namnet kjem av at dei drikk noko bittert til (øl), og balle er bolle.

Ein stor attraksjon i Rotterdam er mathallen deira, Markthal. Det er ein diger halvrunding med mathall i midten. Kanten rundt er fylt med husvære. Inni hallen er der mykje godt å smaka, dersom ein ruslar rundt frå bod til bod. Osten er naturlegvis svært populær, men folk står òg gjerne i kø for ekte handlaga friterte poteter.

Dersom du treng endå eit argument for å byta ut Amsterdam med Rotterdam, så er hotellprisane om lag halvparten.

Men maten er like god.