Typisk norsk

Lonely Planet Norway har mykje å lære oss nordmenn om oss nordmenn. For eksempel et vi sursild kvar morgon: «The Norwegian day starts with coffee (always!), a boiled egg and some sort of bread or dry crispbread (normally Ryvita) topped with cheese, cucumber, tomato and a type of pickled herring.»

Typisk norsk II

Ingen vil ta den siste biten; han blir liggande igjen på fatet. Vi er så høflege.

Dagens oppgåve

Bøy verbet velle i presens, preteritum og perfektum i setninga «Ei kjensle av lykke (...) fram i Nina Lykke då ho vann endå ein litteraturpris.» Svar nedst på sida.

Høyrt på bussen

«Klima, klima, klima! Er det ingen som vil klina lenger?!»

Skog og mark

Sagt av turvenninne: «Sjå, det treet liknar ein eg var i lag med ein gong, berre opp ned.»

Kommafeilvits

«Ho var ikkje feilfri. Han hadde angst for eksempel.»

Vekas dilemma

Viss du må velje: Vil du sitte med eit barn på fanget resten av livet eller sitte på eit fang i ein bar resten av livet?

Oppgåvesvar

«Ei kjensle av lykke vell fram», «Ei kjensle av lykke vall fram» og «Ei kjensle av lykke har volle fram i Nina Lykke (...)».

Greidde du det? Då fortener du ein premie som gjer deg lykkeleg: Kjøp bøkene Min historie av Petter Northug jr., Min historie av Michelle Obama og Min historie av Jens Stoltenberg i halloweengåve til deg sjølv, klipp ut annakvar side i dei, bland sidene og sett dei inn igjen i feil bok før du les alle tre frå perm til perm mens du et fiskebollar: God bok!