Årets nynorskkommune er Vinje

Kulturdepartementet har kåra Vinje i Telemark til årets nynorskkommune.

­­– Nynorsk er eit mindretalsspråk og treng eit særleg vern. Det har Vinje kommune skjøna, seier Margrethe Kvarenes, seksjonssjef i Språkrådet, som har leidd juryarbeidet på vegner av Kulturdepartementet.

I juryen sit òg representantar for Nynorsk kultursentrum, Landssamanslutninga av nynorskkommunar, Noregs Mållag og KS.

Juryen legg vekt på at Vinje er ein føregangskommune i arbeidet for å gje innvandrarar norskopplæring på nynorsk, og at kommunen har kravt nynorsk i felles profilering av Vinje som reisemål.

Prisen, som vart delt ut måndag, er på 100.000 kroner.

Bokhandlarprisen til Simon Stranger

Dei som driv bokhandel her i landet, har stemt fram Leksikon om lys og mørke som den beste romanen i år.

­– Det er ei personleg bok og dessverre ein roman med ein stadig meir aktuell klangbotn, sa Simon Stranger då han fekk prisen tysdag.

Då forfattaren fekk greie på at svigermora, som er frå ein jødisk familie, hadde budd i huset der Rinnanbanden heldt til, Bandeklosteret, byrja han å grave fram historia om familien.

Bokhandlarprisen vart delt ut for første gong i 1948. Då heitte prisen «Takk for boken»-prisen og gjekk til Sigurd Hoel. Bokhandlarprisen, som har hatt det nye namnet sidan 1981, er ein bronsestatuett av bilethoggar Nils Aas.

tiril@dagogtid.no