Faktabok

Jan-Kåre Øien:

Marihønas bok om biller og edderkopper

Ena, Vigmostad & Bjørke

To av tre artar på jorda er insekt. Ta billene: Heile 400.000 ulike artar finst. Berre i Noreg er 3600 artar registrerte. Artsrikdomen er fantastisk, men utviklinga er alarmerande. Insekta døyr. Denne boka oppmodar lesaren om å passe betre på dei.

Dette er den andre utgjevinga i ein serie der marihøna viser veg ut i naturen. Vi får lære om eit utval insekt i norsk fauna. Alle blir presenterte gjennom to ulike teikningar som syner styrken og breidda i Jan-Kåre Øiens illustrasjonskunst.

Først kjem ei vitseteikning som leikar med skapningen vi skal få lære meir om. Snutebilla er på restaurant og bruker snabelen som sugerør i brusflaska. Tordivelen gifter seg på ein hestelort som i songen. Deretter kjem teikningar som minner om plansjane i naturfagrommet då vi var små: detaljerte, men med eit kunstnarleg preg.

I faktateksten vender forfattaren seg til eit sansande «du». Han oppmodar lesaren om å kjenne, lukte og lytte.

Framstillinga er både lærerik, festleg og sanseleg, men tek for lett på den store utfordringa vi står i. Etter å ha lese boka lurer eg framleis på korleis eg kan ta vare på insekta.

Janne Karin Støylen