action / ANIMASJON / komedie

Regi: Chris McKay

Lego Batman filmen

(Orig. tittel) The Lego Batman Movie

Stemmer: Will Arnett, Michael Cera, Rosario Dawson. (Dei norske stemmene stod

I Lego-versjonen av Gotham City er Jokeren desperat etter å få erkerivalen Batman til å hata seg. På snedig vis utfordrar han egotrippevnene til Batman. Samarbeid med den nye politimeisteren Barbara og den foreldrelause guten med kallenamn Robin blir einaste måten å redda byen frå Jokerens slemme plan.

Ikkje klossete

Kor artig kan det vera å sjå legoklossar kledde ut som superheltar slåst med kvarandre for å berga verda? Ikkje så reint lite, viste det seg då Legofilmen (2014) kom ut. Tempoet er like kjapt som replikkane, humor og ironi går frydefullt hand i hand, og å melda oppfølgjaren, der Batman er hovudperson, blir på mange måtar to sider av same sak, då dei er skorne over ganske identisk lest.

Betre nummer ein

Likevel hadde den fyrste filmen noko endå meir laussloppe og leikent over seg (om det går an å seie det slik når det som faktisk skjer, er at filmskaparane leikar med legoklossar). I fyrste filmen vart dette også gjort eit poeng av, at det er me vaksne og born som skapar universet, at det er me som herskar, og det er handlingane våre som gjev direkte konsekvens for andres eksistens.

I Batman-versjonen har denne noble dimensjonen forsvunne til fordel for rein underhaldning og moro. Og moro er det absolutt, men eg sat att med ei betre kjensle sist gong, trass i – eller kanskje akkurat på grunn av – at legoklossar kunne gjera ein forskjell.

Brit Aksnes

Brit Aksnes er frilans kulturarbeidar og fast filmmeldar i Dag og Tid.