Drama

Regi: Tuva Novotny

Britt-Marie var her (Orig.tittel: Britt-Marie var här)

Med: Pernilla August, Stella Oyoko Bengtsson

Britt-Marie (August) likar «ordning och reda». Ho har halde seg heime med støv på hjernen i førti år medan mannen har skjøtta økonomien og sett på fotball. Då mannens elskar dukkar opp, stikk Britt-Marie. Ho blir fritidsleiar og fotballtrenar for tiåringar på ein småstad med ei pizzasjappe, ein grusbane og ein fritidsklubb som kommunen vil legge ned. Ære være henne for det.

Mindre motstand

Skodespelaren Tuva Novotny viste seg som ein kompromisslaus regissør med Blindsone. Britt-Marie var her er rake motsetninga. Brått er vi i eit kjent og traust landskap av svenske storfilmar som skal nøye mildt utan å tråkke på tær. Dette eit trygt prosjekt, der kjende andlet er å sjå i filmatiseringa av endå ein populær roman av Fredrik Backman. Formelen følgjer altså suksessen til En mann ved navn Ove, ein ganske grei film med publikumstekke.

Meir ung tru

Orsak avsløringa, men Britt-Marie var her har ingen overraskingar. Ein kan knapt spore konflikt. Ein far frå kommunen i dress er ein tam trussel. Fleire av figurane er OK, og Stella Oyoko Bengtsson gjer ei flott tolking av Vega, som brenn for fotball. Både fridomsferda til Britt-Marie og ungdom som kraft er fine tema, men her finst ikkje filmatisk opprør. Estetisk er vi milevis unna to sprelske skandinaviske filmar om ungdom i fjor, svenske Amatører og danske Team Hurricane. Sjå heller Heimebane. Og ikkje legg ned ungdomsklubbar.

Håkon Tveit

Håkon Tveit er lektor i latinamerikansk kultur og historie ved Universitetet i Bergen og fast filmmeldar i Dag og Tid.