Filmfjes

Kim Ki-Duk er eit flittig filmfjes. Han har laga meir enn ein film i året sidan mange i Noreg fekk augo opp for koreanaren i 2003 med Vår, sommer, høst, vinter … og vår. I førre veke kom Fanget i nettet på kino.

Om du er lei av alle som masar om å byggje murar, tilrår eg denne engasjerande og spennande filmen om ein nordkoreansk fiskar som mot sin vilje driv på land i Sør-Korea. Fiendebilete og fordomar på båe sider av grensa får hard medfart. Det er sunt og godt.

H.T.

Sjå på nett no

(Netflix) Dei nyanserte mannsrollene i Moonlight sende tankane til dokumentarfilmen The Mask You Live In av Jennifer Siebel.

I solid amerikansk tradisjon vert kva ein forventar av menn, problematisert. Samfunnets sosiale tvangstrøyer tyder trøbbel same kva kjønn du høyrer til. Spesielt tenåringar burde sjå denne kjenslekraftkuren.

H.T.

Tre på topp:

Eg er på ingen måte nokon stor animasjonsfilmentusiast, men eg har framleis eit nært og kjært forhold til følgjande seriar:

1. Ren & Stimpy (1991–1993) Rå, absurd humor om den sleipe bikkja Ren og den teite katten Stimpy. Chihuahua så langt frå veska til Paris Hilton som du kan koma.

2. The Muppet Show (1976–1981) Musikken, rollegalleriet, dokkene, Swedish Chef – kva er det ikkje å elska?

3. Skrotnisse och hans vänner (1985) Rein nostalgi. Hugsar fint lite, anna enn at det var spennande og at eg gledde meg enormt til kvar episode.

B.A.