Folkemusikk

OTTAR FYLLINGSNES

ottar@dagogtid.no

Klangen av Norden står sentralt på festivalen som går av stabelen frå 5. til 9. juli.

Det store prosjektet har fått namnet Nordic Sound Folk Orchestra, og det vert leia av den svenske orkestergeneralen Karl Johan Ankarblom. Det er lagt opp til eit storsleg folkemusikkorkester med 40 nordiske folkemusikarar, solistar og komponistar frå fire nordiske land. På konserten skal orkesteret spela nykomponert musikk av norske Jorun Marie Kvernberg, svenske Mia Marin, finske Antti Järvela og danske Harald Haugaard.

Men Førdefestivalen byr på mykje meir.

Det vert forboden musikk frå Kapp Verde på toppen av Hafstadfjellet. Ved elvebreidda av Jølstra vert det ørkenblues med Tinariwen frå Mali, medan det vert samba frå Brasil i ein låve oppunder fjellet.

Frå USA kjem det som vert omtalt som det beste klezmerbandet i verda, The Klezmatics, som feirar 30-årsjubileum. Frå Bulgaria kjem Bulargian Voices Angelite, og frå Portugal kjem Ricardo Ribeiro, som vert omtalt som det heitaste fadonamnet no om dagen.

Men det vert mykje norsk også. Ti år etter at Sigrid Moldestad hadde suksess med Taus og historia om Samuline Seljeseth og spelekvinnene som spelte fele mot menn og viljen til øvrigheita, får oppfølgjaren premiere på festivalen med Samuline – frå fela flyg din song. Moldestad stiller med eit sterkt lag musikarar, og det vert urpremiere i Førde 8. juli.