Presse

Eva Aalberg Undheim

eva@dagogtid.no

Dag og Tid auka opplaget med 0,5 prosent til 11.271 i fjor. Samla gjekk 105 av 226 aviser fram, og totalopplaget for avisene tilkytte Mediebedriftenes Landsforening (MBL) og Landslaget for lokalaviser (LLA) auka for fyrste gong sidan 1997.

Svein Gjerdåker, som er redaktør i Dag og Tid, seier framgangen er svært gledeleg.

– Det er viktig for at vi skal ha ei god og solid presse. Vi går òg fram med 60 og får mykje skryt for avisa. Det gjer oss optimistiske til å nå målet vårt om 15.000 abonnentar i løpet av nokre år, seier Gjerdåker.

Totalopplaget for norske aviser er på om lag to millionar eksemplar, ifølgje MBL. Den positive utviklinga kjem fyrst og fremst av at auken i digitalt opplag er større enn nedgangen i opplag på papirutgåver, ifølgje administrerande direktør Randi S. Øgrey i MBL.

Dag og Tid lanserer òg ein eigen app om kort tid.

Blant avisene som aukar, går Aftenposten fram mest i talet på aviser, med 13.777. Bergens Tidende aukar med 2882, Bergensavisen med 2352, Klassekampen med 1605 og Nordlys med 1402. Største relative auke har lokalavisene Alvdal midt i væla, Vestby Avis og Sandnesposten, som går fram med mellom 18 og 30 prosent.

Blant vekeavisene aukar Aftenposten junior med 2386 og Morgenbladet med 128.

I motsett ende av skalaen går VG tilbake med 14.973 til 82 015, Dagsavisen går tilbake med 1756 og Vårt Land med 1361.