FYRSTE POLSKE BOOKERPRISVINNAR

Den polske forfattaren Olga Tokarczuk er tildelt den internasjonale Bookerprisen for omsett litteratur. Tokarczuk, som er ein bestseljande forfattar i heimlandet, debuterte som poet og har seinare skrive noveller, romanar og essay. Ho får prisen for Flights, ein roman juryen meiner guidar lesaren under overflata av moderniteten og inn i kjernen av menneskenaturen. Tokarczuk er den fyrste polske forfattaren som får prisen.

NYNORSKLITTERATUR FRÅ AASEN TIL NO

For fyrste gong kjem det ut ein samla presentasjon av den nynorske skjønlitteraturen. I verket Nynorsk litteraturhistorie, som Jan Inge Sørbø står bak, er 150 forfattarskap frå Ivar Aasens tid til i dag representerte. Boka kjem ut i høve 150-årsjubileet til Det Norske Samlaget og skal lanserast på Nasjonalbiblioteket 28. mai.

SLÅR HARRY POTTER-REKORD

Forlaget Bloomsbury, som har hatt stor suksess med Harry Potter-bøkene, har for fyrste gong overgått rekordomsetninga frå då den siste Harry Potter-boka kom ut i 2007. Forlaget auka i fjor omsetninga med 13 prosent til 161,5 millionar pund, skriv danske Politiken.

Salet av Harry Potter-bøkene auka med 31 prosent i fjor og står framleis for ein stor del av omsetninga til forlaget. Samla er det på verdsplan selt over 500 millionar bøker i bokserien, som er omsett til meir enn 80 språk.

eva@dagogtid.no