HOPPHAIKU

HÅVARD REM

post@rem.no

I fjor fekk den japanske stilhopparen Noriaki Kasai Holmenkollmedaljen. Måndag vert han feira med ei haiku-førestilling i hopptårnet. Til neste år er det 30 år sidan fyrste gong Kasai tok del i verdscupen i skihopping, i Sapporo, i lag med mellom andre Ole Gunnar Fidjestøl – rett utruleg når me veit at 45-årige Kasai framleis er aktiv. Om han kvalifiserer seg til vinter-OL i Sør-Korea neste år, vert det dei åttande vinterleikane hans. I sitt sjuande OL, i Sotsji i 2014, tok han imponerande nok sølv i stor bakke og bronse i laghopp.

– Kjem Kasai til Pyeongchang i februar?

Me spør lyrikaren og Kasai-kjennaren Endre Ruset, som i haust gav ut diktboka Noriaki, ei samling hopphaiku, og som i desse dagar turnerer med ei Noriaki-førestilling, ein dekorert teseremoni, saman med jazzmusikaren Stian Omenås og biletkunstnaren Karin Augusta Nogva. Ferda har gått til Ulvik, Bergen, Molde og Ålesund. Når ho måndag endar i hopptårnet i Holmenkollen, opptrer Ruset saman med musikaren, jodlaren og strupesongaren Bjørn Tomren. Ruset svarar:

– Spørsmålet er ikkje om Noriaki kjem til Pyeongchang, for det gjer han. Om Sapporo får vinterleikane i 2026, vil han enda karrieren der som 53-åring. Spørsmålet er om Petter Northug kjem til Pyeongchang.

Av di hopptårnet berre tek 25 personar, held Ruset og Tomren to førestillingar. Ruset resiterer haiku, ei japansk diktform på tre liner, denne gongen vigd skihopp på tre sekund, medan Tomren bidreg med strupesong frå Tuvalu, ein øynasjon i Stillehavet. Drakta til Noriaki er stilt ut ved inngangen, og haikuboka finn ein i Holmenkollen skimuseum. Båe førestillingane er utselde.

Ruset driv òg Olympiastadion Sportstidsskrift på nett og papir. No skal han førebu seg til vinterleikane i februar. Han fortel:

– Då skal sportstidsskriftet arrangera ein diktkonkurranse. I gamle dagar var jo poesi ei olympisk grein. Det er difor naturleg at me delar ut olympisk gull i poesi i samband med vinterleikane i Sør-Korea.