HEKSA ER INNE

Det okkulte skyt opp frå undergrunnen i stor stil, og særleg er det heksa som heimsøkjer litteraturen, melder den danske avisa Politiken og viser til Mette Moestrups båltale i 2013 der ho kom med ein open invitasjon: «Kvar by har mange ulike hekser, og der er plass til mange fleire.» Mykje tyder på at invitasjonen har vorte høyrt, skriv avisa, og viser til Hekseskolen på den litterære scena, som forfattarane Johanne Lykke Holm og Olga Ravn starta i 2015.

Kasper Olstrup, som forskar i det okkulte i feltet mellom estetikk og politikk ved universitetet i København, meiner at ein kan snakka om ein tilbakekomst av det okkulte både i kunsten og litteraturen.

– Fidusen med det okkulte er at det er knytt til krisetider. Når livet vert prekært, blømer det okkulte som fellesskap. Alltid! Det kan ein merka heilt tilbake til renessansen, seier han.

OM DET UMOGLEGE

Forfattaren og forlagsmannen Geir Gulliksen er intervjua i Weekendavisen. Der seier han:

– Det er godt å stå overfor noko som verkar umogleg. Det at det verkar umogleg, gjer det mogleg. Det som kan skrivast utan vidare, er ofte konvensjonelt. Eg trur på usikkerheit. Usikkerheit er godt. Eg er usikker når eg skriv og usikker når eg les. Viss ein er skråsikker, er det av di ein skriv eller les noko velkjent, seier Gulliksen til den danske avisa.

KLASSISK MUSIKK SLÅR FOTBALL

I Tyskland er det opp imot 40 prosent fleire publikummarar på klassiske konsertar enn på fotballkampar i Bundesligaen, skriv Politiken.

Forretningsføraren i den tyske orkesterforeininga er overtydd om at det er starten på ein ny tendens. Statistikken frå orkesterforeininga DOV fortel at oppslutnaden om klassiske konsertar steig med 10 prosent førre sesong.

I alt skal 18,2 millionar ha vore innom 13.800 klassiske konsertar

ottar@dagogtid.no