Hjorth og Torvund fekk pris

Vigdis Hjorth og Helge Torvund vart tildelte Doblougprisen under opninga av Litteraturfestivalen på Lillehammer. Prisen er på 200.000 svenske kroner og vert delt ut av Svenska Akademien. Juryen skriv om Hjorth at ho har utvist ein aktiv, nær sagt aktivistisk forfattarskap, aldri vore føreseieleg og aldri likesæl i møte med kjærleiken, med samfunnet ho skildrar, eller med livsvilkåra karakterane i bøkene hennar er plasserte i. Om Torvund skriv juryen at han gjennom nesten tretti diktsamlingar gjennom fire tiår frå slutten av 1970-talet, og gjennom stor aktivitet elles i teneste for orda, har synt at han fyrst og fremst er lyrikar.

Doblougprisen går til svensk og norsk skjønnlitteratur og til litteraturhistorisk forsking.

Liv Gulbrandsen leier Bokåret

Forfattar og formidlar Liv Gulbrandsen, som dei siste sju åra har leidd samanslutninga Leser søker bok, er tilsett som prosjektleiar for Bokåret 2019. Det skriv nettstaden Bok365.

Det er Nasjonalbiblioteket som har invitert til nasjonalt bokår neste år, 500 år etter at den fyrste norske boka vart trykt. Bokåret 2019 skal feirast med minst 500 arrangement i 500 bibliotek over heile landet. Nyleg vart det kjent at regjeringa set av 30 millionar kroner på å fremje leselyst i Noreg i løpet av året.

Nobelpris-uvisse

Tildelinga av Nobelprisen i litteratur kan verte forseinka med meir enn eitt år, skriv danske Politiken. For ein månad sidan vedtok Akademien at prisen ikkje vert delt ut i 2018 på grunn av den låge tilliten til Akademien etter skandalar og uro den siste tida. Planen er at prisen for 2018 skal delast ut i oktober neste år i staden, saman med prisen for 2019. Slik vert det ikkje nødvendigvis, ifølgje Politiken.

eva@dagogtid.no