Innanfor og utanfor

Kan arkitektur nyttast for å stø opp under mangfald, forme fellesskap og skape ei verd der det er plass til alle? Det er i alle fall utgangspunktet for det svenske kunst- og arkitekturkollektivet Mycket, som fleire av oss no kan verte betre kjende med.

Nasjonalmuseet har nemleg invitert kollektivet til å lage ein installasjon som vil forvandle delar av museet. Installasjonen utgjer éin del av utstillinga Inn i fellesskapet, som opnar fredag 23. september.

Betydinga av ein fellesskap har vore viktig i skeive miljø, og for Mycket er ideen om fellesskap, det å finne sitt «community», noko som kan knytast til ei tid, ein stad og ein arkitektur, skriv Nasjonalmuseet.

Mycket har late seg inspirere av skeive rom og skeiv nattklubb­arkitektur i arbeidet sitt med å skape interaktive verk og klubbkonsept.

Utstillinga er ein del av Oslo arkitekturtriennale og Skeivt kulturår.

Spor av skeiv historie

Utstillinga Decriminalizing History opna på Universitetsbiblioteket i Bergen 1. september og vert ståande ut året. Kurator David Carillo Rangel og prosjektkoordinator Tonje Berge Paulsen står bak utstillinga, som er sett saman av funn i bibliotekmagasina og skal vise spor av den skeive historia vår.

«Utstillingen er ment å være en feiring av mangfold, men også en erklæring av skeiv uavhengighet. En uavhengighet som synliggjør kamper for identitet og mening, samt retten til å elske hvem man vil», skriv Paulsen i ei nyhendemelding i På Høyden.

Dei som ikkje har tenkt seg til Bergen og Universitetsbiblioteket, har høve til å sjå ei digital utstilling.

Også denne utstillinga er ein del av feiringa av Skeivt kulturår, som markerer at det er 50 år sidan lovforbodet mot sex mellom menn vart oppheva.