Marknadsføring

RONNY SPAANS

ronny@dagogtid.no

Gregor Falkner er ny marknadsansvarleg i Dag og Tid. Namnet har slett ingen nynorskklang, men folk av vidt ulikt nasjonalt opphav er velkomne i Dag og Tid, like til folk frå garpegenitiven sitt heimland. Gregor Falkner er tyskar, nærare bestemt austberlinar. Han var berre fire år då muren mellom Aust- og Vest-Berlin fall i 1989, og har dermed ikkje så mange personlege minne om livet i aust.

Men med Berlinmurens fall stod Vest-Europa open for familien Falkner.

– Det fyrste møtet mitt med Noreg var som barn på sumarferie på Vestlandet, i Sogn og Fjordane og Hardanger, ja, dei vanlege turiststadene. Men eg vart hugteken av Noreg og kom difor attende seinare i livet, fortel Falkner på flytande norsk.

Han oppheldt seg i Noreg i 2004, og kom attende – etter mellom anna eit toårig opphald i Danmark – i 2007. I Danmark og Noreg tok han utdanning innan marknadsføring og økonomi, han har mastergrad frå BI i Oslo, som den beste studenten i klassen.

Slottsknekt

I dag er han busett med norsk kjærast i Noreg, og han har ulike arbeidsrøynsler bak seg på norsk jord. Det mest merkverdige er jobben som slottsknekt hjå dronning Sonja og kong Harald.

– Slottsknekten var opphavleg hestemannen på slottet. Han gjorde klar hestane når kongen eller dronninga skulle ut og ri. No har slottsknekten meir ein funksjon som altmogelegmann, mellom anna tok eg imot gjester som skulle i audiens hjå kongen.

Falkner fortel at han som slottsknekt fekk innføring i alle rare ting som kunne skje på slottet, som: Kva skal gjerast om dronninga sit fast i heisen? Heldigvis slapp han slike uhell. Snart oppdaga dei kongelege Falkners teft for kroner og øre og gav han jobben som skattmeister – eller på moderne norsk: Han fekk jobb i økonomiavdelinga på slottet.

Digitale kampanjar

Og vegen frå dei kongelege til Dag og Tid er sjølvsagt stutt. Gregor Falkner arbeidde deltid med digitale kampanjar, marknadsføring og sosiale medium i Dag og Tid då han studerte. No har hatt fått fast stilling med same ansvarsområde. Men stillinga i Dag og Tid er ikkje det fyrste møtet hans med avisverda.

– Eg kjem sjølv frå ein tysk journalistfamilie. Både mor og far er utdanna og har jobba som journalistar. Aviser som Die Zeit, Der Spiegel og Frankfurter Allgemeine Zeitung var ein naturleg del av oppvoksteren min. Eg kjenner meg difor heime i ei avis som Dag og Tid.

Falkner talar perfekt norsk, han har òg gjennomskoda at bokmål er dansk utkledd som norsk:

– Då eg budde i Danmark, tala eg norsk med tysk uttale, det gjekk forundrande lett.

– Er du klar for overgangen til nynorsk?

– Eg er på jakt etter eit nynorskkurs, så eg kan bruke nynorsk på jobben. Det er heilt naturleg i og med at det er ein nynorsk arbeidsplass. Eg er elles oppglødd for nynorsk, det har ein høgtideleg klang over seg som bokmålet vantar.