Lobotomi vil seia å operera i ein lapp. Å fjerna ein hjernelapp vert kalla lobectomi, eller leucotomi. Antonio Egas Moniz, portugisisk professor i medisin, fekk Nobelprisen i 1949 for «påvising av den terapeutiske verdien av prefontal lobectomi ved visse psykosar».

Metoden er for lengst forlaten. Å bli skoren i hjernen var Gunvor Hofmos store angst som pasient på Gaustad sykehus. Overlegen på mannsavdelinga var ivrig tilhengjar, han på kvinneavdelinga absolutt motstandar. Mange lobotomerte døydde. Ein ikkje-namngjeven gravplass på Ris kirkegård går under namnet «Den ukjente pasients grav». Gunvor Hofmo slapp. Ho kurerte seg sjølv.

Men ikkje Knut Ødegårds slektning Lars, som er tileigna eit mektig dikt i Ødegårds nye diktsamling Tida er inne. Her er berre plass til å sitera frå innleiande og siste avsnitt.

Knut Ødegård, fødd 1945, skal ha applaus for den store innsatsen i norsk poesi etter debuten 1967: 13 eigne diktsamlingar, 3 diktutval, 10 bind med omsetjingar av islandsk, færøysk, irsk og makedonsk lyrikk, 4 bind med Edda-dikt 2013–2016 og ein heil del anna. Viktig er igangsetjinga av Bjørnson-festivalen i 1992 – den første litteraturfestivalen i landet – som han leia i 20 år. Dikta hans er omsette til 37 språk, visstnok meir enn nokon annan norsk lyrikar.

Ei from og kristen livserfaring lèt seg lese ut av skrifta hans i dag:

Eg veit ingen ting å seia dykk om dødsriket,

sa onkel Knut. Eg veit berre om ein bror

som går og slit sko på den tynne jordskorpa vår.

Men søkk vi ned i dødsriket,

så har jo Kristus vore der òg.

JAN ERIK VOLD