Målprisen til VG

Tysdag 17. oktober delte Noreg Mållag ut Målprisen 2017 på Det Norske Teatret i Oslo. I år gjekk Målprisen 2017 til Gard Steiro, ansvarleg redaktør i VG.

– Eg må fyrst seia at det er ei stor ære å vinne ein slik pris. Samstundes ser eg på lista over tidlegare prisvinnarar at det er mange som har gjort mykje meir for nynorsken enn det eg og VG har gjort, sa Gard Steiro på tilstellinga.

– Etter at Gard Steiro overtok redaktørstolen i VG, har det vorte ei oppmjuking av språket. Journalistane kan no bruke nynorsk der det er naturleg. Han har med andre ord sett døra på gløtt for nynorsk i VG, fortalde leiar for Noregs Mållag, Magne Aasbrenn.

– Vi har mjukna opp nynorsklinja fordi vi skal vera ei avis for heile folket. Då er det underleg med eit forbod mot nynorsk, var det kloke tilsvaret frå Steiro.

– Taj Mahal er bygd av svikarar

Det meiner den indiske politikaren Sangeet Som frå Bharatiya Janata-partiet (BJP) som sit i regjeringa i landet. For nokre veker sidan var det kjende marmormausoleet, som er ein av Indias største turistattraksjonar, fjerna frå turistbrosjyrar i området det ligg i. Det seier seg sjølv at dette har ført til sinne og diskusjon, og no har det altså kulminert i den ekstreme kommentaren til Sangeet Som. Det handlar sjølvsagt om religion. Shah Jahan, som bygde Taj Mahal til minne om yndlingskona si i 1643, var muslimsk mogul. Shah Jahan fór ille åt med hinduar i samtida. Sangeet Som er sjølv hindu.

Nalin Kohli, ein annan medlem av BJP, har tatt avstand frå utsegna til partikollegaen.

– Taj Mahal er ein viktig del av historia vår. Det som har skjedd, kan ikkje viskast ut, seier Kohli.

Taj Mahal tek imot om lag seks millionar turistar i året.

Årets norske sentrum

Norsk Sentrumsutvikling heldt sin årlege sentrumskonferanse i Kristiansand denne veka. Dei arbeider for at næringsliv og styremakter skal fremja gode by- og tettstadsentrum i Noreg. Det er viktig, for byspreiing og kjøpesenterutvikling hindrar tette, trivelege sentrum. Norsk Sentrumsutvikling deler ut ein årleg pris for god sentrumsutvikling. I år vann Fredrikstad prisen. Fredrikstad vart tidlegare i år også kåra som Noregs mest attraktive stad.

ronny@dagogtid.no