Den siste tida har Nynorsk Pressekontor samarbeidd med NTB om å utvikla eit omsetjingsinstrument eller ein robot. På budsjettet for i år fekk NPK ei statleg løyving på 800.000 kroner til dette, og på statsbudsjettet for neste år er løyvinga ein million.

Det var i 2007 at NPK valde nærare samarbeid og samlokalisering med NTB, og pressekontoret flytta bort frå Dag og Tid i Pilestredet. I tillegg til å laga eigne saker byrja NPK å setja om NTB-artiklar til nynorsk. No sender kontoret ut om lag 100 av dei 300 artiklane som NTB produserer kvar dag.

Då NPK flytta inn hjå NTB, sende pressekontoret ut 5500 saker årleg. Sidan har talet auka kraftig, og i fjor nærma det seg 30.000 saker. Men det kan verta snakk om endå meir, og roboten som set om NTB-artiklar, er årsaka til det. Samstundes auka eigenproduksjonen av artiklar frå 1700 i fjor sommar til om lag 2800 denne sommaren.

Redaktør Karoline Riise Kristiansen kan gle seg over at det i år vert produsert fleire artiklar enn nokon gong i NPK-redaksjonen, og dei har aldri tidlegare nådd ut til så mange med stoffet.

Stor interesse

Men det er ikkje berre Nynorsk pressekontor som kan ha god nytte av ein robot som kan setja om bokmålstekstar på eit blunk. Då Aftenposten nyleg omtalte roboten, var spørsmålet: «Kan flertallet droppe nynorskundervisning i fremtiden?»

Førebels greier ikkje roboten å omsetja til perfekt nynorsk, men han vert stadig betre. I november i fjor omsette roboten 12,5 prosent av orda feil. No har han kome ned i 5 prosent og vert stadig betre. Men heilt perfekt vert han neppe. Kompetente nynorskbrukarar må lesa gjennom og retta opp feila som er att. Dei kan ikkje berre trykkja på ein knapp og vona at alt ordnar seg, for då vert Pia Høst fort til Pia Haust.

I dag kan nynorskbrukarane gle seg over ein viss valfridom i det nynorske språket, men det er eit problem for roboten, ettersom han nyttar berre éi form.

Kontroversielt

Så langt er det berre NPK som har teke i bruk roboten, men det er stor offentleg interesse for å kjøpa tilgang til han. Som kjent er det krav om 25 prosent nynorsk i departementa, men stadig kjem det meldingar om at dei ikkje oppfyller krava. For byråkratane kan roboten med andre ord verta til god hjelp i framtida.

I artikkelen i Aftenposten går det fram at det vil ta minst eitt år før roboten er klar til levering.

– Me opplever at det er eit stort ønske om robotstøtta omsetjing. Det fører med seg eit ansvar å vera spydspiss for utvikling av språkteknologi for eit så lite miljø. Digitalisering og robotisering av språk er kontroversielt. Me tek det med oss og vonar å kunna utgjera ein forskjell, seier redaktør Karoline Riise Kristiansen, som for nokre veker sidan gjorde det klart at ho hoppar av frå NPK for å verta språksjef i NRK.

Førre fredag vart det kjent at ansvarleg redaktør i Sogn Avis, Jan Inge Fardal, er tilsett som ny redaktør og dagleg leiar i NPK.