Onsdag denne veka lanserte regjeringa ein pris som skal delast ut årleg til ein person, institusjon, grupper eller organisasjon som har vist stor innsats og engasjement for skeive og for menneskerettar.

– Fram til ho døydde i 2021, var Friele ein aktiv samfunnsdebattant med brennande engasjement for skeive og for menneskerettar generelt. Ho var avgjerande i kampen om avkriminaliseringa av homofili i 1972 og leidde den største skeive organisasjonen her i landet i mange år, seier Jaffery.

Føremålet med prisen er å anerkjenne arbeidet mottakaren gjer for å betre situasjonen til dei skeive. Saman med prisen vil mottakaren få eit økonomisk bidrag som skal støtte opp under arbeidet. Ein jury utnemnd av Kultur- og likestillingsdepartementet vil dele ut prisen.

Minneprisen skal delast ut kvart år under Oslo Pride. Første utdeling blir neste år.

– Kim Friele skal ha uttalt at «mot er ei bølgje som riv alle med seg, også dei som ikkje tør». Friele var den bølgja her i Noreg. Minneprisen skal gå til dei som er med på å skape slike bølgjer, seier Lubna Jaffery.

Regjeringa har som mål at Noreg skal vere pådrivar for skeives rettar internasjonalt, og at skeive blir verna mot diskriminering, forfølging og overgrep.