Må bruke meir pengar

Åtte universitet og høgskular er bedne om å bruke meir pengar om dei ikkje vil risikere at Kunnskapsdepartementet kuttar i løyvingane deira. Det melder nettavisa Khrono, som vert gjeven ut av Oslomet – storbyuniversitetet. Dei åtte utdanningsinstitusjonane som ifølgje departementet har for mykje uteståande midlar, er Universitetet i Agder, Noregs musikkhøgskole, Universitetet i Tromsø, Høgskolen i Østfold, Norges Handelshøyskole, Høgskolen i Molde, Høgskulen på Vestlandet og Nord universitet. Alle har ubrukte midlar som utgjer meir enn 10 prosent av samla løyvingar.

Pris til Caroline Albertine Minor

Danske Caroline Albertine Minor mottok denne veka P.O. Enquists pris, som vart delt ut i Noreg for fyrste gong. Litteraturprisen skal gå til «ein yngre forfattar på veg ut i Europa», og inneber ein månads opphald i ein valfri europeisk hovudstad.

Minor debuterte i 2013 med romanen Pura vida, og gav i fjor ut novellesamlinga Velsignelser. I grunngjevinga frå juryen heiter det at Minor alt i si andre bok syner eit internasjonalt format.

Minor er òg nominert til Nordisk råds litteraturpris, som vert delt ut seinare i haust.

Filmfestival protesterer

Det kjem ikkje til å verte synt filmar om transpersonar under Mix Copenhagen LGBTQ Film Festival, som blir arrangert i perioden 26. oktober–4. november. Festivalen har vedteke å boikotte filmar der det ikkje er transpersonar sjølv som spelar transpersonar. Det melder Danmarks Radio.

– Vi er ein etter måten liten festival, men vi kan likevel sende eit signal. Dersom du gjerne vil ha filmen din synt, må du la transkjønna personar få spele si eiga historie, skriv festivalen i ei pressemelding.

eva@dagogtid.no