«NORDIC NOIR
ER DØD»

Den britiske fjernsynsmeldaren Mark Lawson i The Guardian tek hardt i. Nyleg hevda han at den nordiske fjernsynssjangeren Nordic Noir er død. Han meiner at sjangeren, som dei danske seriane Forbrytelsen og Broen er eksponentar for, er i ferd med å drukna på grunn av for myke samarbeid mellom land og for mange produksjonar. Dei harde orda kjem delvis i forlenginga av kritikken av fjernsynsserien Midnight Sun. Lawson meiner at ein har blanda for mange ulike språk i denne serien. Etter suksessen med Broen, som var eit dansk-svensk samarbeid, har det vorte gjort freistnader med fleire liknande produksjonar. Problema byrjar når dei samarbeidande landa ligg for langt frå einannan.

RASISTISK
BESTSELJAR

Donald Trumps rådgjevar Steve Bannon og franske Marine Le Pen har sansen for den same boka: Jean Raspails De helliges leir. Då boka kom ut i 1973, vart ho ein flopp, men etter at Bannon og Le Pen har propagandert for henne, har ho plutseleg vorte ein suksess, skriv Aftonbladet.

I boka byrjar det i Gangesdeltaet med millionar av migrantar som flyktar frå fattigdom og elende i stuvande fulle båtar. Dei hamnar i «paradiset» på den franske Rivieraen, og fordriv snøgt bort dei som budde der opphavleg.

Forfattaren Jean Raspail er i dag 93 år, og han hevdar i eit intervju at boka berre handlar om «det sjokket som det fleirkulturelle samfunnet vil medføra», det vil seia at menneske av ulik rase ikkje kan leva saman. Franske journalistar har nyleg granska boka og funne ut at ho kan fellast på heile 87 punkt, om dei hadde gått til sak. Debatten boka har vekt i Frankrike, har i det minste ført til at forlaget har trykt boka i nytt opplag.

ottar@dagogtid.no