Riksantikvaren har freda fleire bygningar

Førre fredag vedtok regjeringa å frede det gamle trehusmiljøet i Levanger som kulturmiljø. Det inneber at gater, plassar, parkar og bygningar i Levanger sentrum vert freda etter kulturminnelova. Andre fredingar er det sjeldsynte interiøret frå mellomkrigstida i den tidlegare tobakksbutikken Reimers & Søns eftf. i Olav Kyrres gate 1 og jugendhuset i Kong Oscars gate 70 i Bergen. Romanivillaen på Nedstrand i Rogaland vart freda fordi han kan knytast til historia til romanifolket i Noreg.

Nye julehefte i sal over helga

Med Herborg Kråkevik som redaktør kjem juleheftet Juleroser ut for fjerde gong. Nytt i år er juleheftet Barnas juleroser.

Begge er dei litterære julehefte med tekstar frå mange kjende forfattarar og kunstnarar i vår tid. Dei to julehefta, som òg er rikt illustrerte, har i år bidrag frå Vigdis Hjorth, Linda Eide, Håvard Vikhagen, Frode Grytten, Thorvald Steen, Maria Parr, Lisa Aisato, Bobbie Peers og fleire andre.

– Eg håper at Juleroser og Barnas juleroser kan gje deg jul i hjartet, slik dei gjorde for meg då eg var barn, og at vi har klart å lage noko som er så vakkert at det ikkje blir kasta ut med det brukte julepapiret, seier redaktør Herborg Kråkevik i presseskrivet.

Julehefta som blir gjevne ut i eit samarbeid mellom Samlaget og Egmont Publishing, er i sal frå neste veke.

Bok om prislønte Synnøve Persen

I 40 år har den samiske biletkunstnaren og forfattaren Synnøve Persen utforska språket i fargar og poesien i musikk. Tidlegare i år fekk ho Kulturrådets ærespris 2018. I boka Luondduadjágasat – Dreamscapes, som vart lansert denne veka, skildrar forfattar Susanne Hætta kunstnarlivet til Synnøve Persen på ein dokumentarisk og kunstnarleg måte, fortel presseskrivet.

tiril@dagogtid.no