Riksantikvaren held festtale

Hamardomen, vernebygget over domkyrkjeruinane på Domkirkeodden i Hamar, er 20 år i 2018. Det vart markert på dagen 20 år etter opninga 9. august 1998. Det skriv Riksantikvaren på nettstaden sin. Jørn Holme var der for å halde festtale:

«Det er ikke ofte Riksantikvaren er med på 20-årsjubileum for en bygning. Som regel er det 400 år eller mer», sa Jørn Holme då han opna jubileumsfeiringa av Hamardomen på Domkirkeodden.

Både domkyrkjeruinane og vernebygget, teikna av arkitekt Kjell Lund i Lund & Slaatto, er freda. I tillegg til å vera eit dobbelt kulturminne, ein viktig formidlingsarena for museum og kulturarena for byen, er domen eit kyrkjerom – faktisk ein av dei mest populære stadene for vigslar i Noreg.

Aretha Franklin er alvorleg sjuk

Det melder pressebyrået AP. Aretha Franklin er ein amerikansk soulsongar, kjend som The Queen of Soul og eit av dei største kvinnenamna innan denne sjangeren, ja ein av dei største artistane i heile musikkverda. Ho var fødd i Memphis i den amerikanske delstaten Tennessee. På andre halvdelen av 1960-åragjorde ho ei rekkje soulinnspelingar som har blitt klassikarar, til dømes «Respect», «I Never Loved a Man» og «You Make Me Feel Like a Natural Woman». Ho fekk to songar på førsteplass på Billboards Topp 100. Ho song sist i november på ein konsert for Elton John Aids Foundation. Pressebyrået har ikkje meir informasjon om sjukdomen, men det kjem vel etter kvart.

Bergman-bok

Ein biografi om Ingmar Bergman kjem ut i november, boka er skriven av hushjelpa til regissøren, Anita Haglöf, Jag var Ingmar Bergmans hushållerska er tittelen. Boka kjem ut ni år etter at den planlagde utgjevinga. Ho vart stogga i 2009, fordi innhaldet var «for personleg», det var forfattaren sjølv som stoppa utgjevinga. Men no har Haglöf endra meining. Boka kjem ut til 100-årsjubileet for Bergmanns fødsel.

ronny@dagogtid.no