Per Anders Todal

peranders@dagogtid.no

– Vi opplever at namnet Equinor har sett seg raskt, og det opnar for god dialog om korleis vi er i utvikling som selskap, seier informasjonsdirektør Bård Glad Pedersen.

– Vi valde med vilje eit namn som ikkje skildrar kva vi gjer. «Statoil» gav inntrykk av at vi berre driv med olje. «Nor» fortel noko om kor vi kjem frå, og så er «Equi» noko vi må fylle med innhald og skape assosiasjonar til.

Samlande fjord

Eva Hove er ordførar i Stordal, som blir slegen saman med Norddal til Fjord kommune.

– Vi skulle finne eit namn som var samlande. «Storfjord» kunne vore greitt for vår del, men det er oppteke. «Fjord» er eit godt norsk ord, og alle bygdene våre ligg ved fjorden. Vi såg òg på andre kommunenamn som Fjell, Sund, Os og Vik, og dei er ikkje kvalitativt ulike «Fjord».

– Arne Sandnes, kollegaen din i Norddal, meiner namnet Fjord kan vere bra marknadsføring?

– Det er i alle fall ikkje noka ulempe. Vi ligg jo i det vestlandske fjordlandskapet. Men det var ikkje viktig for valet.

– Folk i Sogn og Hardanger har meir fjord å vise til enn de?

– Det er sant, men mange kommunar har høgare fjell enn Fjell kommune òg.

Utan kystline

– Vi klarte å slå «Vestland» og alle saman, altså? Det var ikkje verst, seier Even Aleksander Hagen, fylkesordførar i Oppland.

– Det meste av arealet i Noreg er innland?

– Ja, men mange institusjonar i Hedmark og Oppland brukar allereie «innlandet» i namnet. Og av dei nye fylka er det berre eitt som ikkje har kystline, og det er Innlandet, seier Hagen.

– Vi ønskte eit nytt namn som ikkje er knytt til berre eitt fylke. Hadde vi brukt namnet «Hedmark og Oppland», kunne det blitt oppfatta som to fylke inn i æva.

– Men er det nokon som verkeleg likar det nye namnet?

– Det skal eg ikkje uttale meg om. Men eg synest det er bra å ha eit nytt, felles namn som alle kan samle seg rundt.