No har det gått så lang tid at eg kan seia sanninga. Då det skjedde, skjøna ikkje det norske folk ein døyt. Ikkje eg heller. Og knappast Karjakin.

Eg minner om opptakta: VM-kampen i fjor haust mellom Magnus Carlsen og Sergej Karjakin vart ein endå større TV-suksess enn tittelkampane mot Vishy Anand. I november vart NRK2 den største TV-kanalen i Noreg av di dei sende sjakk midt på natta.

Då kampen om tittelen enda 6–6 og gjekk til omspel i snøgg-sjakk, rydda NRK1 sendeflata, og kringkastingssjefen inviterte seg sjølv til studio. Over ein million nordmenn følgde sendinga. Eg var òg i panelet, men eg var retteleg invitert, altså. I det fjerde og siste partiet spela Carlsen det avgjerande dronningofferet til h6, kan henda det vakraste sjakktrekket ein har sett gjennom 130 år med sjakk-VM. Det var berre det at ingen såg det.

Karjakin vart perpleks over at han ikkje hadde rokke å gje opp partiet før offeret, så han skunda seg å strekkja fram handa og gratulera den nye verdsmeisteren. Publikum i NRK-studio på Marienlyst reagerte på handtrykket til spelarane med å syngja «Happy Birthday» til Carlsen som fylte 26 år den dagen. Hos VGTV, som òg hadde fleire hundretusen sjåarar, kom confetti dryssande frå taket til vill jubel og tonar frå musikaren Staysman.

«Skal vi gå gjennom avslutninga av partiet på skjermen?» spurde ekspertkommentator Torstein Bae hjå NRK. Men programleiaren fekk svar på øyret frå regien: «Vi må feira Carlsen med jubelscenar. Ingen er interessert i sjakkanalysar no».

For ein herleg kveld, tenkte kringkastingssjefen og eg. Vi jubla saman med resten av folket.

Då eg kom heim, klokka 03 om morgonen, skrudde eg på datamaskinen og fann fram partiet. «Wow! Carlsen ofra dronninga!» Etter 70 timar med direktesende sjakkanalysar denne hausten, miste vi dei siste ti sekunda. Det var for seint å gå attende til NRK, men eg sette meg i ein drosje og snakka om dronningofferet på TV 2s «God morgon, Noreg». Det vart ein god morgon, trass alt.

Atle Grønn

Atne Grønn er internasjonal meister i sjakk