Eva Aalberg Undheim

eva@dagogtid.no

Ein statsråd måtte gå for å ha føreslege og gjeve verv til vener, ein annan for å ha kjøpt aksjar i våpen- og teknologiselskapet KongsbergGruppen, som regjeringa like etter indirekte inngjekk storkontrakt med, og ein tredje for å ha vore inhabil på grunn av aksjekjøpa til ektemannen. Samstundes: Ein opposisjonsleiar som vel å verte sitjande sjølv om det er avdekt at ho var inhabil i fleire av sakene ho handsama då ho sat ved makta, fordi ektemannen hennar på same tid gjorde fleire tusen aksjehandlar. Satireteiknarane i Noreg må ha hatt uvanleg gode kår i 2023.

Habilitetssakene i både regjering og opposisjon er òg utgangspunktet for fleire av satireteikningane som no er valde til å henge utstilte på Stortinget – som ei oppsummering av fjoråret. Bråket rundt Fosen-vindturbinane, herjingane til Trump, dyrtida og posisjonen til Trond Giske er blant dei andre temaa som er illustrerte.

Utstillinga, som har kome til gjennom eit samarbeid mellom Stortinget og Avistegnernes hus, vart avduka av stortingspresident Masud Gharahkani (Ap) onsdag denne veka, og skal henge på Stortinget det neste året.

– Avisteikningar som kritiserer og harselerer, er ytringsfridom i praksis. Teikningane har ein naturleg plass i Stortinget, og vi som er politikarar, må tole å verte granska med avisteiknarblikk, sa stortingspresidenten ifølgje M24.

Dag og Tid-teiknaren May Linn Clement står for ei av dei ti teikningane som er valde ut, og var til stades under avdukinga.

Dei andre teiknarane som har bidrege, er Herbjørn Skogstad, Gina Gylver, Siri Dokken, Knut Høihjelle, Hilde Thomsen, Morten Mørland, Egil Nyhus, Fredrik Skavland og Fadi Abou Hassan.