Stor Per Kleiva-utstilling i Oslo

Fredag 2. november opnar utstillinga Kniv i vatn på Kunstnernes Hus i Oslo. Utstillinga av kunsten til Per Kleiva er den største i Oslo på over 30 år og inneheld verk som ikkje er viste sidan 1960- og 1970-åra.

­– Med presist og poetisk formspråk, eksperimentell tilnærming og brennande politisk engasjement kan Kleiva sjåast på som ein avantgardepioner i Noreg, heiter det i presseskrivet.

Utstillinga som viser eit utval bilete på tvers av sjanger og tiår, har hovudvekt på måleri og skulptur, og blir ståande til 13. januar 2019.

Hanna Geiran er ny riksantikvar

Etter over 100 år har Noreg fått sin første kvinnelege riksantikvar. Førre fredag vart Hanne Geiran utnemnd til stillinga. Ho kjem frå stillinga som direktør for Direktoratet for kulturminneforvaltning.

– Med Hanna Geiran får Riks­antikvaren ein direktør med solid leiarerfaring, sterk fagkompetanse og lang erfaring med arbeid med kulturminne, seier klima- og miljøminister Ola Elvestuen (V) i ei pressemelding.

Hanna Geiran er utdanna sivilarkitekt og har vore tilsett hos Riksantikvaren sidan 2005.

­– Eg gler meg til å ta til med arbeidet saman med kunnskapsrike og engasjerte kollegaer. Eg ynskjer at kulturminne skal ta endå større plass i samfunnsdebatten. Kulturminnevern er ei folkerørsle som får fleire og fleire tilhengjarar, seier Hanna Geiran.

Kulturminnepris til Gamle Skudeneshavn

Riksantikvarens kulturminnepris 2018 går til Foreningen Gamle Skudeneshavn, som i 50 år har arbeidd for å ta vare på trehusmiljøet i Skudeneshavn i Rogaland. Gamle Skudeneshavn har 130 eldre trehus, som voks fram med sildefisket på 1800-talet, og er mellom dei trehusmiljøa som er best tekne vare på her i landet.

Foreininga har drive med opplysningsverksemd og motivasjonsarbeid sidan 1968, og det var foreininga sjølv som kom med framlegg om vern i 1976.