Sunnmørsk suksess i København

Ein ung sunnmøring begeistrar København – nok ein gong. «Foran et Tivoli-orkester i skjorteærmer bekræftede nordmannen Bror Magnus Tødenes (25), at tenorer stadig kan begejstre med store følelser og høje toner», skriv Politiken, som omtalar han som «en helt forrygende tenor». Den danske avisa viser til at førre gong velta han Copenhagen Opera Festival, då han song og sigra med ein naturgjeven meisterklang og eit kunstnarleg fokus som har gjeve karrieren til nordmannen verdsvengjer og floge han til festspela i Salzburg og statsoperaen i Wien. Politiken slår fast at sjølv om Bror Magnus Tødenes frå Ulsteinvik enno er i gang med å perfeksjonera det uvanlege talentet sitt, har han alt nådd opp til tenortindane.

Større enn Netflix

Den kinesiske strøymetenesta IQiyi har fire gonger så mange brukarar som Netflix, melder Politiken. No kan ein for første gong strøyma eit av dei mest populære fjernsynsprogramma deira i Vesten.

IQiyi, som har hovudsete i Beijing, har vakse seg til å verta Kinas absolutt største strøymeteneste, med 420 millionar brukarar. Tenesta har så langt operert på den kinesiske og malayiske marknaden. For få år sidan spelte grunnleggjaren av firmaet, Yu Gong, ei statistrolle som drosjesjåfør i IQiyis første dramaproduksjon. I vår var selskapet New York-børsnotert, og no vert aksjen omtalt som «Wall Streets mest trendy kinesiske aksje».

Per Olov Enquist om sjukdomen

I eit intervju med svenske P1 Kultur fortel forfattaren og dramatikaren Per Olov Enquist om tilstanden etter slaget han fekk for to år sidan.

– Ein del av hjernekapasiteten forsvinn. Ein misser alle ord og namn. Ein misser verktøykista, seier Enquist.

– Eg har vore retteleg dårleg ei stund. Eg har mange kreftceller i magen, og eg er operert for propp som dei har fjerna. Eg har hjartefeil og er litt hås, som de høyrer, seier han i radiointervjuet.

Tomasz Stanko er død

Den verdskjende polske jazztrompetisten Tomasz Stanko (76) er død etter lang tid med sjukdom. Like sidan 60-talet har han vore eit av dei viktigaste namna innan avantgardejazzen. Stanko, som hadde Miles Davies og Chet Baker som førebilete, gav ut si første plate på det tyske plateselskapet ECM i 1975, og vart ei legende på begge sider av Atlanterhavet, hevdar plateselskapet. Dei siste åra har han budd på Manhattan og spelt mest i jazzklubbar i New York.

Sveltestreik i 80 dagar

Den ukrainske filmregissøren Oleg Sentsov (42) har sveltestreika i 80 dagar. Ifølgje Ap har Sentsovs advokat Dimitrij Dinze fortalt at Sentsov er bleik og sengeliggjande, og at han har vanskar med å røra seg. Han har sete i fengsel sidan 2014, då han vart arrestert og skulda for terror. Sentsov kom frå den russiskannekterte Krim-halvøya då han vart arrestert. Han vart dømd til 20 år i fengsel, og sonar i den nordlege delen av Russland. Human Rights Watch meiner det snakk om oppdikta skuldingar, men Sentsov har vegra seg for å søkja nåde hjå president Vladimir Putin.